Hierdie gerieflike 3-slaapkamer-, 2-badkamerwoning bied gemaklike leefruimtes en uitstekende potensiaal vir 'n ekstra slaapkamer, kantoor, stokperdjie- of werkruimte. Die oorspronklike toesluitmotorhuis is omskep in 'n praktiese verlenging van die woning, met teëlvloere en 'n glasdeur wat die ruimte veelsydig en funksioneel maak.
Wanneer jy by die voordeur instap, word jy verwelkom deur 'n oopplan-sitkamer en -kombuis. Die kombuis spog met granietwerkblaaie wat 'n netjiese en moderne afwerking bied. Vanuit die sitkamer, wat met 'n lugversorger toegerus is, stap jy uit op 'n oop stoep met 'n gesellige binnetuintjie, 'n stukkie grasperk en 'n ingeboude braai – ideaal vir rustige kuiers en ontspanning. 'n Ekstra rak vorm deel van die koop, asook 'n 2 m x 2 m-Wendyhuisie wat bykomende stoorplek bied.
Vanuit die sitkamer stap jy met die gang af, waar die eerste, kleiner slaapkamer aan jou regterkant geleë is. Hierdie vertrek beskik nie oor ingeboude kaste nie, maar kan ook uitstekend as 'n kantoor of stokperdjiekamer ingerig word. Die tweede gasteslaapkamer is aan die linkerkant van die gang geleë. Hierdie twee slaapkamers deel 'n badkamer wat toegerus is met 'n hoekbad, toilet en wasbak.
Aan die einde van die gang vind jy die hoofslaapkamer, wat oor ruim ingeboude kaste en 'n en suite-badkamer met 'n stort, wasbak en toilet beskik.
Vanuit die gasteslaapkamers geniet jy 'n aangename uitsig oor die binnetuin, wat 'n rustige en huislike atmosfeer skep.
Hierdie woning bied 'n uitstekende kombinasie van gemak, praktiese leefruimtes en die buigsaamheid om die ekstra vertrek volgens jou persoonlike behoeftes te benut. Jy is stap afstand van die mooi dammetjie waar sonsondergange die water pienk kleur.
Die gewilde Die Oog Aftreelandgoed in Naboomspruit bied 'n unieke aftreeleefstyl waar veiligheid, natuurskoon en gemeenskapslewe hand aan hand gaan. Inwoners geniet die rustigheid van die Bosveld, met vrylopende wild, 'n verskeidenheid voëllewe en 'n pragtige natuurreservaat wat deel vorm van die landgoed. Die natuurlike warmwaterswembad, restaurant, eetsaal en verskeie sosiale aktiwiteite skep 'n omgewing waar inwoners aktief kan bly en nuwe vriendskappe kan bou. Die nuwe SAVF-ontwikkeling bied verdere geriewe en ondersteuning vir inwoners se veranderende behoeftes. Hier gaan aftrede nie net oor afskaal nie, maar oor die geleentheid om elke dag die beste van die Bosveldlewe te geniet.
Terwyl alle pogings aangewend is om die akkuraatheid van die inligting wat verskaf is te verseker, kan Century 21 Bushveld en sy agente nie verantwoordelik gehou word vir enige foute, weglatings of wanvoorstellings nie. Alle inligting word te goeder trou verskaf en behoort onafhanklik deur voornemende kopers geverifieer te word.